Archive | Junie 2017

Alles op die regte tyd

Ek kry soms sulke dae wat ek sommer net omge-ellie is.  Die finansies verstaan nie dat ek spesifieke uitgawes het nie.  Almal om my is siek, kwaad of hartseer, dan praat ek nie eers van ons arme land, regering en nog die droogte nie.  My loopbaan wil-wil half op ‘n piesangskil op AVBOB se stoep speel en dis net soveel moeite om te moet dink aan ‘n verandering maak.  Ek wens soms ek kan net volgende jaar hierdie tyd opstaan en kyk hoe my lewe uitgedraai het, sonder dat ek deur al hierdie dinge hoef te gaan.

Maar, dan dink ek aan twee onlangse gebeurtenisse wat ek gehoor en beleef het.

Een was van ‘n ouma wat twee dae voor haar dood vir haar kleindogter gevra het om haar bybel te gaan haal en die onderstreepte gedeelte in Psalms vir haar voor te lees.  Die dogter het die onderstreepte verse opgespoor en dit vir haar gelees.  Na haar dood, toe die dogter dit vir haar ouers daarvan vertel en hulle in bybel kyk watter gedeelte dit was, was daar geen vers in die hele bybel wat onderstreep was nie!

‘n Ander ondervinding was iemand wat voor ‘n vergadering vir my gevra het om gou te kom kyk na die sonar van haar baba.  Sy het voorheen ‘n hele aantal miskrame gehad en hulle het gesukkel om uit te vind wat die oorsaak is.  Na behandeling is haar swangerskap suksesvol.  Maar terwyl sy dit vir my vertel, kon sy nie haar trane keer nie ek sien die hemelse verwondering en ongeloof in haar oë dat sy die voorreg het om die sterk lyfie te kon sien wat gesond is en geen sigbare gebreke het nie.  Dit was vir my so ‘n groot ervaring.

Dis dalk heeltemal losstaande dinge van my persoonlike probleme, maar toe ek daaraan dink, toe besef ek dat niks in die lewe eintlik net om my gaan nie.  Ek mag dink dat ek op ‘n slegte plek is, dat ek so graag bestem wil wees vir ander dinge. Maar terwyl ek in my hoekie sit en jammer voel vir myself, is God steeds besig om groot dinge te doen.

Hy is steeds besig om wonderwerke op selfs onnatuurlike maniere te laat gebeur om ‘n boodskap van troos te gee vir ‘n ouma wat begin aanvoel het dat haar horlosie op aarde uitgeloop het.

Hy laat ‘n suksesvolle swangerskap toe vir iemand wat sekerlik al moes moed opgegee het en nie baie hoop gehad het dat dit hierdie keer anders sou gewees het nie.

Ons mag dink dat ons belangrik genoeg is om prioriteit te moet geniet as gevolg van ons situasie.   Dat ons dinge nou moet gebeur, want dit is nou dringend.  Maar dit werk nie so nie.  Terwyl ons wag op God om op Sy tyd (wat die regte tyd is) dinge in ons lewe te doen en uit te sorteer, moet ons besef dat daar baie groter dinge is wat om ons gebeur.

Ek het werklik so baie om voor dankbaar te wees dat ek seker maar regtig kan begin om met ‘n blye hart vir ander te kan mense gun om hulle Godservaring te kry waarvoor hulle so lank gewag het!

“Not because of what we’ve done, but because of who He is!”

Dis eintlik maar al wat ek vandag wou sê.

Advertisements